Login to your account

Username *
Password *
Remember Me
×

تحذير

JUser: :_load: غير قادر على استدعاء المستخدم برقم التعريف: 77

عادل معاطى يرثى عطية عليان

رثا الدكتور عادل معاطى رئيس القناة الرابعة سابقا و رئيس قطاع القنوات الاقليمية السابق شاعر السويس الكبير الراحل عطية عليان قائلا:

ليه طولّت الغيبة علينا ياعم عطية
داحنا وحشنا كلامك كله عن الوطنية
ياما كتبت عن الحرية
وعن الحرب والاستنزاف
وعن الهجرة .. وعن أهالينا
لما لفحت ايامها همومهم فوق لكتاف
وعن الثورة القايدة مراجل في السويسية
وعن الراجل اللي بيمشي ف عز النار مايخاف
م الصفارة
عن مآسينا في بورتوفيق وف شارع النمسا وف الكسّارة
وعن الجارة
اللي بتطلع ف التراسينة
لجل تشوف الحرب بعينها بكل جسارة
وعن الغارة
اللي بتولع لمّا بتسمع صرخة كل ولاد الحارة
تو ماتلمح وسط الضلمة النور كشاف
يبقى لكل الخلق إشارة
وعن الكلمة لما بتبقى ف ننّي عنين الخلق منارة
واستكشاف
اول لما تكون ف ادينا
تلقى السر المخفي قصادها بقى متشاف .. من جوّه عنينا
ومودّينا كلامك لينا ياعم عطية .. زي الساحر والعراف
وعن الست اللي بميت راجل والعشرية
قلبها نابض بالحنيّة
لكين جبارة .. عشان مصرية
ماسكة بإيدها الدفّة بقوة مع المجداف
عارفة بإن الأرض أمانة .. وهي امينة
علشان مصر تكون منصانة
وعن المينا
وعن التار والحق الغايب جوّه ف سينا
وعن الدانة لما بتنزل ف الجبانة
وعن الشهدا اللي انت واصفهم جوة ف شعرك كانوا معانا
زي عيدان الفل بيزحف فوق صفصاف
والأرواح بتطير حوالينا وترجع حيّة
وبتصحّينا
وعن الطفل الحي الواقف م الصبحية
وماهش لاقي العيش الحاف
بس أبيّ ونفسه عزيزة وعالي الراس
عمره ماينسى
إن وجوده مهم لبلده ووقفته ميزة وليها أساس
لجل مايرسى
يرمي الهلب مع الخطاف والسنّارة
لجل يطلَّع حبة شخرم ولا مياس
أو سهلية وبوري معاهم او حفّارة
وماحيلتوش غير قلب صغير فيه اخلاص
وعن الأرض وبحر كنالنا وعن الناس
وعن الماس اللي انت بتغزل منّه مشاعر
جوّه محارة
قادر يوصف صورة بتبهر بالأوصاف
على مدد الشوف
زي الصايغ لما يزوّق أجمل عقد في صدر صبية
وانت صياغتك كانت غيّه وليها ظروف
وامّا دخلنا ف معبد شعرك كنّا ضيوف
وانت كمان شاعر مضياف
قلبك كان صافي وشفاف
لما يشوف
دغري تلاقي الصورة حروف .. مليانة معاني
تجري وراها كما الملهوف
نستناك ف البر التاني
بتحولها كلام وأغاني عن الحرية
احنا أخدنا دروس من شعرك ف الوطنية
حفظّناها لكل ولادنا وبيغنّوها صفوف وصفوف
في الصبحية
فانت اديتنا الشعر هدية
واحنا فتحنا القلب لشعرك ع المكشوف
فابقى تعالى ياعم عطية وبص وشوف

قيم الموضوع
(0 أصوات)

فيس بوك

Ad_square_02
Ad_square_03
.Copyright © 2024 SuezBalady