طباعة هذه الصفحة

يابيوت السويس مالك حزينه ..في رثاء الكابتن غزالي

By نيسان/أبريل 05, 2017 3895



شعر: محمد عبد القوى حسن
مهداه الى روح المناضل الشاعر كابتن غزالى رحمه الله

يابيوت السويس
فين السكينه
سافر حبيبك
سابك حزينه
يابيوت السويس
يابيوت السويس
***
طالع للقناه
الصبح بدرى
وبشوفك باكيه
على ضى بدرى
لاتبكى يامى
قدرك وقدرى
نصبح حزانا
مانلاقى مينا
يابيوت السويس
يابيوت السويس
***
يابيوت السويس
عزى ودارى
بوابتى العاليه
حدى وقنالى
لاتبكى ابدا
باقى ف تاريخنا
بطول الدنيا
كابتن غزالى
يابيوت السويس
***
يابيوت السويس
والعضم باقى
هانلمه نلمه
نضم البواقى
نغرسه ونسنه
ف الارض الشراقى
يطلع يخضر
وابنك يلاقى
من ريحة الشهدا
عطر السواقى
يمسح جبينك
وتدومى لينا
يابيوت السويس
***
يابيوت السويس
على ف حسك
سمعى الدنيا
واشرحى درسك
وانشرى كتبه
طول عمره حارسك
اغانيه وسيرته
تحكى ف حكايتك
واولاد الارض
الحافظين مسيرته
ماينسوا ابدا
اغلى مافينا
يابيوت السويس
يابيوت السويس
***

يابيوت السويس
ويدوم نضالك
نحميك دايما
نحفظ مقالك
ياعم غزالى
بيتك ودارك
ف الجنه العاليه
وسيرتك ف عنينا
مع السلامه
مع السلامه
من هنا ياعمى
ليوم القيامه
مقامك عالى
وكتبك ف ايدينا
نهديها اولادنا
وتفضل عتادنا
نحمى بها دايما
بيوت السويس

قيم الموضوع
(6 أصوات)
السويس بلدي

أحدث مقالات السويس بلدي