بقلم ابن السويس: محمود هاشم
قال زعلانين م اللي انتحر..
عالم بقر..
ما الفقر موت..
والجهل موت..
والقهر موت..
والصمت احيانا كتير..
بيكونله صوت..
ومافيش سمع..
الجوع شبح..
له الف شكل والف لون..
اصعبها من لون الشبع..
بتكفروه..
كنتوا اسئلوه..
كل الببان اتقفلت..
لما اتخنق..
عايش في دنيا مزيفة..
وعالم ورق..
كان عنده حلم معيشه..
فجأة اتسرق..
ما تعلقوش المشنأة..
اصله اتشنق..
وما تشمتوش..
وما تشتموش..
لا مش جبان..
وضعيف وخان..
سوء الظنون..
في الميتين..
اصبح روتين..
جايز يكون..
زي الخزين..
عايش قتيل..
فكر يموت ..
جايز يعيش..
لقى حتى موته..
ما يساويش..
فما تفتريش..
هيخش جنة..
هيخش نار..
ميت الف رأي..
وميت قرار..
ما الظلم نار..
والوحدة نار..
والصبر نار..
مستكترين حتى عليه..
الانتحار
