في اتصال هاتفي بين اول مصابة بالسويس بفيروس الكورونا السيدة " س م " وموقع السويس بلدي تحدثت السيدة باستياء شديد وشكوى من رواد موقع التواصل الاجتماعي الفيس بوك وحملتنا رسالة امانة لتوصيلها لهم .

في البداية سالنا السيدة عن صحتها فقالت انها اليوم افضل من اليوم السابق وانها تتمنى ان يمن الله عليها بالشفاء من اجل اولادها فليس لهم غيرها بعد ان رحل والدهم وتركهم في عمر الزهور ،ثم تركناها تتحدث عن رسالتها فقالت :

انا ست بجري على عيالي الثلاثة اللي ابوهم مات وسابهم لي 3 و 5 و7 سنين وانا كل حاجة بالنسبة لهم وبجري عليهم من المعاش بتاعنا ال 1400 جنيه وعندي محل ببيع فيه هدوم وبخيط على قدي عشان احسن دخلي واقدر اصرف على عيالي ، انا طالبة منك طلب ومش عارفة ليا عمر ولا مليش والناس بتقول كلام عني وعن عيالي احبطني مش عشاني انا عشان خاطر عيالي والناس اللي بتقول اني لفيت الدنيا وعديت السويس كلها وابني هرب مش راضي يروح المستشفى انا هحكي لك كل حاجة وياريت امانة عليكي تكتبيها لهم وتبلغيهم باللي حصل .

طلبت منها ان تستريح ولكنها اصرت ان تستكمل حديثها.

استأنفت السيدة حديثها قائلة : انا جيت من السفر يوم الخميس انا وابني يوسف من معهد الاورام وملحقتش اقعد مع حد قعدت شوية مع العيال في كفر النجار في بيت عمي ومشيت روحت الالبان ونمت وصحيت الجمعة عملت اكل لعيالي ومخرجتش وبنت عمتي اتصلت بيا وقالت لي في التليفزيون بيقولو كل اللي راح معهد الاورام لازم يروح الحميات عشان يحلل عشان فيه فيروس كورونا اتعدى بيه الطاقم الطبي بالمعهد ، انا روحت مستشفى الحميات يوم السبت ولما النتيجة طلعت ايجابية ولادي الثلاثة راحو المستشفى هم والسواق واثنين من عيالي اللي كانو قاعدين معايا عملو التحليل والسواق كمان عمل التحليل والحمد لله طلعو سلبي ، لكن الناس شهرت بيا وبعيالي وبالست بتاعة التموين اللي اتوقف حالها والناس خايفة تتعامل معها ، وانا اصلا لاشفتها ولا تعاملت معها ولا وقفت في المحل من قبل ما اسافر ولحد ماحللت واكتشفت اني اتعديت بكورونا .

ارجوكم انا مش عاوزة اكون سبب في وقف حال حد او قطع رزق حد بلاش تجيبو سيرتنا وسيرة الست دي ثاني .

انا بحمد ربنا على كل حال لكن شايلة هم ابني يوسف انا اللي بجري بيه والرزق بتاع ربنا بالله عليكم خلو بالكم من يوسف ابني دة ملهوش غيري .

هنا انتهى كلام السيدة ووضعت يوسف ابنها امانة في اعناقنا .