Login to your account

Username *
Password *
Remember Me

•• سيبيا | رحلة فنانات مصريات لاحياء التراث المصري علي ارض مصرية ••

دايما لما كنا بنفتح مواقع شراء منتجات أجنبية كنا بنلاقي ملابس واكسسوارات كتير مصنوعة بتصميمات مصرية علي ايد اجانب من جنسيات مختلفة وبنشوف كم كبير من البيزنس اللي بيتم بأيادي أجنبية باستخدام

 تاريخنا وتراثنا المصري القديم وده كان في غياب لوجود ايادي وعقول مصرية تنفذ منتجات بتحمل التراث المصري بشكل عصري وجذاب في مجتمعنا وتكون منتجات مصرية ١٠٠٪ كتصميم وكا فكرة وتنفيذ.

لحد ما بدأت عقول الشباب المصري المبدع تلتفت لأمر زي ده وتوظف موهبتها وابداعها والتراث الثقافي لاجدادها في شكل مشاريع مختلفة لاكسسوارات وملابس متنوعة بتحمل الطابع المصري والهوية المصرية 

وكان منه واولهم البراند المحترم SEPIA Jewellery.

واللي أسسه خمس بنات مصريات مبدعات وهما "يارا ودارين ومنار ويارا ودينا" واللي جمعهم حلم واحد لما كانو في قسم الديكور بكلية الفنون الجميلة اتعرفوا على بعض في مشروع التخرج وكان مطلوب منهم تصميم منتجات مستوحاة من التراث.

 وبالفعل صمموا منتجات كويسة بخامات مختلفة زي الجلود والنحاس والخيوط وكانت المنتجات مميزة بالفعل وكانت تجربتهم ناجحة ومن هنا  قرروا يحولو مشروع تخرجهم لمشروع انتاجي خاص وهو SEPIA Jewellery.

«Sepia» هو درجة من اللون البني اليل كان يستخدمها الرسام ليوناردو دافنشي في لوحاته ولأنه كان من أهم فناني عصر النهضة، قرروا يستخدموا اسم «Sepia» لتحقيق حلمهم وإحياء الحضارة والتراث المصري القديم تيمنآ بأعمال ليوناردو.

المشروع بدأ ببعض رسومات للحلي مستوحاة من دراستهم لتاريخ الحضارة المصرية واتفقوا ينفذوها في ورش متخصصة ومن ثم قرروا يعرضوها على مواقع السوشيال ميديا اللي اتفاجئوا فيها باعجاب وقبول كبير جدًا من الناس اللي تهافتت علي شغلهم ومنتجاتهم ومن بعد التخرج وتنفيذهم للمشروع شاركوا في معارض كثيرة اخرها معرض "خان شريف" اللي نظمة واطلقه الإعلامي Sherif Madkour واللي كان مبادرة منه لتشجيع الصناعة المصرية واتعرض في المعرض عدد من المنتجات المصرية واليل أغلبها كان بيحمل الهوية المصرية في التصميمات والتنفيذ.

وراء كل قطعة من Sepia حكاية من التراث المصري القديم قدر فنانات مصريات انهم يعرضوها بشكل عصري ولافت جذب كتيير من الناس وكانوا بمثابة أداة نشر قوية للتراث المصري وبالفعل شوفنا منتجاتهم في كليب أغنية "مروت إك" اللي اطلقتها السوبرانو المصرية Amira Selim, Soprano

كل التوفيق لفنانات Sepia وكل التوفيق لكل الشباب المصري المبدع اللي بياخد خطوة في استغلال ابداعة لإنشاء براند مصري قوي قادر يحي التراث المصري والهوية المصرية بين الناس من تاني.

قيم الموضوع
(0 أصوات)

فيس بوك

Ad_square_02
Ad_square_03
.Copyright © 2024 SuezBalady