مرثيه للشاعر الكبير عبدالعزيز عبدالظاهر لرفيق الدرب الكابتن غزالي.....

غزالى مــــــــــــــــات *

طلعوا لسود يا ستات السويس
وارفعوا راية الحداد يا كل رجالة البلد
واكتبوا فوق الحيطان مات اللى كان
أغنية يومى بتتولد
نغمة على وتر السماسم تتنشد
سكة لبكرة تنفرد
حضن المحبة والتبات
غزالى مات
آخرنا مات
لكنه عايش بعدنا
دفتر حكاوى العاشقين
على إسمه ياما حينكتب إسم السويس
من يوم نزول الدمع فوق خد العريس
من يوم ما خلينا الكفن دم الشهيد
واتحط قدام البيوت ساتر حديد
وانشق حلق القهر واتحشرج نغم
قولنا نعم للموت على صوت المدافع
طلعت ولاد الأرض حمّالة المواجع
تنده على كل اللى راجع م الميدان مدبوح
قول يا غزالى بصوتك المبحوح
غنى يا أبوح
أبكى ونوح سلطان *
ماكنش فات إلا الألم تعلب
وقلت فات الصبح بشموس الأمل مركب
من بين جبال العتمه يا محمد
شفت الصباح
عاوج طقيته ع الجبين اسمر ومتعاجب
والناس أمم راجعين م الغربة بتحارب
شاليين على كتافهم زمن زى الكفن لغبر
غزالى مات
نقصت ياإسم السويس كام حرف
بقيت كمان ممنوع فى اللغه م الصرف
آه يا علم خللى الألم ذادنى
كإن مات اليوم أبويا والا ابنى
موتك تاعبنى قوى
وانا مستوى م الجرح
وانت اللى كنت الصبح ف القهر يدن فرح
إنت اللى صوتك ضمنا يا عمنا لما انجرح فينا الغنا
تبدر غناوى الأرض والضمه والصحبه
راح اللى راح
وانت اللى باقى يابطل حارس على الكلمة
وآدى انت رايح عريس لحبايب الأمه
سلم على فايز وولاد أبوهاشم *
سلم على كامل وعطيه والعشى *
وبكره يوم اللقا حنكمل اللمه .
---------------------------------------------------
*هو محمد أحمد غزالى ( الكابتن غزالى ) مؤسس وقائد وواضع كلمات وألحان فرقة ولاد الأرض أهم فرقة فنية عبرت عن المقاومة ضد الإحتلال الصهيونى للأرض العربية *
*سلطان أول شهداء فرقة أولاد الأرض أثناء حرب الإستنزاف *
*فايز وأولاد أبوهاشم مصطفى وإبراهيم شهداء المقاومة الشعبية *
*كامل عيد وعطية عليان أبرز شعراء المقاومة فى السويس *
* حسين العشى مؤسس جريدة الوعى أقدم جريدة إقليمية ومؤرخ تاريخ السويس