أخبار السويس

ممدوح أحمد محمود خليفه , طالب فى الصف السادس الإبتدائى بمدرسة أحمد شوقى الإبتدائية بشارع النيل .. سنه 12 سنة .

ممدوح ليه 5 إخوات غيره هو أصغرهم وكان زي ما بيقولو دلوعة العيلة , والدته كانت موظفة فى القوى العاملة وإتوفت بالظبط من 11 شهر ( رحمة الله عليها ) ..

والده دخله أكاديمية جاسكو جنب الصالة المغطاه وكان مواظب ع الحضور فى النادى والمدرسة .

يوم الخميس 2014/10/23 كان المفروض إن ممدوح هيشارك فى الفاعليات المقامة فى الصالة المغطاه للإحتفال بالعيد القومى , لكن ممدوح راح مدرسته الصبح وعدى على بيت خاله وأخوه وبعدين راح عند أخته تقريباً الساعه 3:30 العصر , غير هدومه ولبس طقم النادى وقاله لأخته إنه رايح الصالة المغطاه عشان يلحق الفاعليات لإنه كان متأخر وعلى أمل أنه يلحقهم .. قبل ما ينزل تليفونه وقع منه وباظ ونزل من غيره .. ممدوح نزل من عند أخته الساعه 4:30 تقريباً ... متوجه للصالة المغطاه ... منا هنا ومعرفناش حاجه عن ممدوح .

إبتدينا نتحرك يوم الجمعة وراح والد ممدوح قسم الأربعين عشان يعمل المحضر وعمل المحضر برقم 5145 لسنة 2014 إدارى الأربعين ( إتغير بعد كدة لجنائى الأربعين ) .

وإبتدينا ندور على ممدوح فى كل مكان فى السويس ونشرنا صوره فى كل ع النت وفى السويس , وروحنا الصالة المغطاه وقابلنا موظف شغال هناك وسألناه على ممدوح قالنا فعلاً فى ولد جالى فى حوالى الساعه 5 العصر وكان بنفس المواصفات دى وقلتله إنه جاي متأخر أوى ومشى .

لفينا فى كل الأقسام والأحداث والمستشفيات وعل كل أصحابه وروحنا عرب المعمل لإن كان ليه زميل فى المدرسة شغال فى الخردة وإكتشفنا حاجات كتير هناك زي وجود عشش بيبات فيها أولاد كتير هربانين من أهاليها وفيهم إللى بيشتغل فى الخرده ومحدش يعرف عنهم حاجه .

أماكن كتيييير رحناها وناس أكتر سألناها ... لغاية ما جيه يوم الثلاثاء وواحد إتصل بوالد ممدوح حوالى الساعه 9 بالليل وقاله إنه شاف ممدوح بينام فى الجنينة إللى قدام كاستيلو قرب الإستاد .. إتحركنا كلنا وفتشنا فى كل مكان من كاستيلو للكورنيش لبورتوفيق .. وناس قالتلنا إنهم شافوه من نص ساعه ومعاه فوطة بيمسح بيها عربيات و بالتالى روحنا سألنا عسكرى مرور إشارة كاستيلو وقولناله العيال إللى بتمسح عربيات فى المنطقة هنا بينامو فين ؟؟ .. قالنا فى الجنينة دى وأحياناً فى الجنينة إللى فى ضهر سور الإستاد قدام جامع الشبان المسلمين ... جرينا كلنا على الجنينة دى وفتشنا فى كل مكان فيها لغاية ما أخو ممدوح دخل فى مكان كله مليان بوص ومحروق وهو بيفتش حس إنه داس على حاجة طرية , فجاب كشاف وبص لقى جثة متفحمة تماماً والدود واكلها , إفتكر إنها جثة كلب .. فحب يتأكد أكتر بص ع الجمجمة وإتأكد إنها جثة بنى آدم , ومن طول الرجل ظن إنها جثة راجل كبير .. والجثة كانت بدون قدمين ( القدم مش الرجل كلها ) , راح إتصل بالشرطة وبلغهم , وفى خروج أخوه من الجنينة كانت الشرطة بتمر ( بالصدفة ) ووقفو لإنهم شكوا من ركنة الموتسيكلات بتاعتنا برة .. فسألونا إنتو بتعملو إيه هنا ؟؟ قلنالهم إن أخونا متغيب من يوم الخميس وعاملين محضر وجالنا تليفون إنه كان هنا وبالصدفة لقينة جثة ..

لغاية اللحظة دى فاكرين إنها جثة حد منعرفهوش , وكنا هنمشى , لكن قلنا نفضل معاهم نساعدهم لعل الله يساعدنا فى العثور على ممدوح , لإننا كنا على علم إن ممدوح إتشاف من نص ساعه واليومين إللى فاتو فى نفس المكان , بالتالى الجثة مش جثة ممدوح ..

حضر عدد كبير من رجال الشرطة , ورئيس مباحث السويس وطلبو مننا نوريهم مكان الجثة .. دخلنا تانى عشان نوريهم المكان ... لما شافو الجثة كانو برضو مترددين دى جثة كلب ولا بنى آدم , أخو ممدوج قالهم لا دى جثة بنى آدم وشاورلهم على الجمجمة وأثبتلهم إنها جثة بنى آدم .. ظابط قال إن الجثة فى وضع إغتصاب إستناداً للوضع الرجلين , لكن مش متأكد إذا كان ولد ولا بنت ... قلتله الطبيعى إذا كانت الجثة على بطنها هيكون ولد وإذا كانت على ضهرها هيكون بنت .. لكن الواضح إن الجثة على بطنها والوش على الأرض .. 

طلب رئيس المباحث إن حد يرفع رأس الجثة عشان التأكد .. محدش قرب من الجثة غير أخو ممدوح ومسك حديدة وقالهم أنا لما جيت أول مرة رفعت الجمجمة كدة ولقيت الوش وش بنى آدم بالشكل دا ..

دار الحديث دا بينى ( إبن خال ممدوح ) و تامر ( أخو ممدوح ) .. قدام كل الظباط .. وإحنا بنشرح وضع الجثة ( كل دا وإحنا فى نيتنا بنساعدهم لله عشان ربنا يساعدنا إننا نلاقى ممدوح ) :

تامر بيرفع رأس الجثة ..
أنا شايف حاجة حمرا على ضهر الجثة 

أنا : إرفع كدة الحاجة الحمرا دى شوفها إيه ؟؟
تامر : دى شكلها تى شيرت !
أنا : لونه إيه يا تامر ؟؟
تامر : لونه أحمر !!
أنا : أحمر !!! مكتوب عليه إيه يا تامر ؟؟؟؟
تامر : مكتوب عليه جاسكو أكاد بالأنجليزى !!!!!!

( التى شيرت كله محروق عدا الكلمة دى )

فى الوقت دا أنا وتامر كنا فى أصعب صدمة مرينا بيها فى حياتنا ... إحنا كنا هنمشى , وقلنا نساعد , وبنشرح , طلعنا بنشرح على جثة أخونا

فى الوقت دا الظباط أمروا بالقبض على كل الأولاد إللى بيمسحو عربيات وإللى بيشحتو وإللى شغالين على أي باترينة شاى أو غيره فى الكورنيش والمنطقة دى للتحقيق معاهم ..

وطلعنا كلنا على قسم السويس للتحقيق معانا طال لمدة 3 أيام 

فى تفاصيل كتير حصلت قبل وبعد العثور على الجثة مذكرتهاش لإنها محل تحريات من مباحث السويس بالإضافة لوجود مشتبه فيهم ..

لكن آخر شئ وصلناله إن التقرير المبدئى للطب الشرعى قال إن الجمجمة لشخص يتراوح سنه مابين 14 لـ 20 سنة , وممدوح سنه 12 سنة , لكن للأسف دا مش خبر يطمننا لإن دماغ ممدوح كبيرة شوية , وحالياً إحنا فى إنتظار التقرير النهائى للطب الشرعى وتحليل الـ DNA وإللى غالباً هتظهر نتيجته بكرة الأحد .

إحتمال يكون ممدوح وإحتمال ميكنش ممدوح , لكن إللى متأكدين منه إن القضية فيها ألغاز كتيييييير أسأل الله أن يمن علينا وعلى رجال المباحث بكشفها .

إحنا راضيين بقضاء الله عز وجل فى الحالتين مع العلم إن الحالتين كارثة , إذا كان ممدوح فإن الله أرحم عليها مننا ولكن ممدوح ميستاهلش الموت بالطريقة دى , وإن مكنش ممدوح فالموضوع أصعب لإننا مش عارفين مصيره إيه ..

الموضوع بالنسبة لينا أكبر من موضوع إبن لينا راح , الموضوع موضوع غابة عايشين فيها وللأسف غابة بدون قيود .. كتير أهالى بيبلغوا وبيعملوا محاضر بفقدان أولادهم ولكن بدون إهتمام من أي مسئول .. وللأسف التحرك بيكون بعد فوات الآوان .

وإن إستمر الوضع كما ما هو عليه فلا عزاء لكل من سيفقد أحد أولاده .


بالله عليكم أنشروا القصة فى كل مكان على قد ما تقدروا على صفحاتكم فى كل الجروبات فى كل الصفحات خلوها توصل لكل بيت فى السويس وفى مصر .. عشان نلاقى حل للكارثة إللى عايشينها و عشان منخسرش أعز مالينا .. أولادنا .