معبد الكرنك، الأقصر. Karnak Temple Complex

أكبر معبد فى العالم و أقدم دار عبادة على الأرض و مدرج ضمن قائمة اليونسكو للتراث العالمى.

الحقيقة إن الكرنك مش معبد واحد، و لكن مجمع معابد (10 صروح دينية).. و يعتبر ثانى أهم مقصد سياحى و تاريخى داخل مصر بالنسبة للسياحة الأوروبية (بعد الأهرامات).

كل معابد مصر القديمة كان بيتم بناءها فى عهد ملك معين. و كانت أعمال تشييد و بناء المعبد بتستغرق فى حدود 20 سنة و بتكون فى فترة حكم الملك. زى معبد الملك رمسيس الثانى فى أبو سمبل، و معبد الملكة حتشبسوت فى غرب الأقصر..

لكن الكرنك حاجة تانية خالص،،، أعمال البناء و التشييد في مجمع الكرنك استمرت لأكثر من 2000 سنة (أيوه ألفان عام).. من بداية الأسرة 12 فى عصر المملكة الوسطى من تاريخ الأسرات (يعنى حوالى 2100 ق.م)، و فضلت أعمال البناء مستمرة فيه لحد بعد نهاية عصور الأسرات المصرية كلها، و حتى بعد بداية العصر اليونانى كانت أعمال البناء و التشييد فيه مازالت مستمرة ?

طوال كل العصور دى، كل ملوك مصر كانوا بيشاركوا فى بناء و تشييد الكرنك، و كل ملك كان بيتولى الحكم كان بيهتم بتطوير مجمع المعابد و يبنى صروح جديدة و يحاول يخللى المعبد أكثر روعة عن الملك اللى سبقه... تقريبا كل ملوك الدولة الحديثة تركوا آثارهم و بصماتهم داخل الكرنك: الملك توت عنخ آمون، الملك رمسيس الثانى و رمسيس الثالث، الملكة حتشبسوت، الملك تحتمس الثالث و غيرهم من الملوك و الملكات. عشان كده مجمع معابد الكرنك اتحول لدليل كامل على مراحل تطور الفن المصري و الهندسة المعمارية الفريدة.